Baztan haurrekin

**Xorroxingo ibilbidea** familiarekin ihesaldirako bikaina da: baso artetik doan ibilbide erraza, ur-jauzi ikusgarrian akitzen dena. Haurrek naturarekin harreman zuzenez gozatuko dute eta magia eta kondairaz beteriko ingurune bat ezagutuko dute. Adin guztiendako abentura eta lasaitasuna uztartzen dituen esperientzia.

**Bertizko Natur Parkea**, bere lorategi botaniko ikusgarriarekin, familian gozatzeko leku aproposa da. Mendeetako zuhaitzez, lore exotikoz eta edertasun handiko txokoz inguratuta dauden ibilbideek txikienendako ingurune lasai eta hezigarria eskaintzen dute. Espazio paregabe honetan paseatzea familia-plan bikaina da, non natura eta dibertsioa bisita bakoitzean uztartzen diren.

**Zugarramurdiko Leizeak**, bere historiagatik ezagunak (haurrendako bereziki pentsatutako **“Mitologia Abentura” jarduera du), eta **Urdazubi eta Sarako leize ikusgarriak** batera, bisita paregabeen multzo bat osatzen dute ingurune magikoan. Haien galeriak, kondairak eta lurpeko paisaiak ezagutzea dibertigarria bezain hezigarria da. Zalantzarik gabe, hiru leizeak familiaz gozatzeko plan ezin hobeak dira, txikienen jakin-mina piztuz.

**Bidasoako Bide Berdea** familia haurrarekin joateko plan bikaina da, naturan bizikletaz, oinez edo patinetan ibiltzeko aproposa. Gaur egun, bidea eraikitzen jarraitzen dute eta Doneztebe – Elizondo tarte berria gutxi gorabehera 2026ko otsailean inauguratzeko aurreikusia dago.

Donezteben, GarmendiTX enpresak bizikleta-alokairu erosoa eskaintzen du ibilbidea egin nahi izanez gero.

**Amaiurko eta Zubietako errotak** familia-plan bikainak dira, bisita gidatu hezigarriak eskaintzen baitituzte, haurrak ehotzearen historiara eta tradiziora hurbiltzeko. Amaiurreko errotan, gainera, txikienek tailer dibertigarri batean parte har dezakete, non **taloak** nola egiten diren ikasiko duten, gure eskualdeko irin-tortilla tradizional goxoak.

Eskualdean familiendako arras erakargarriak diren bi gasnategi bisitatu daitezke. **Kortariko Borda**, Lekarozen, ardiez eta behiez gain, artzain-txakurraren erakustaldi interesgarria eskaintzen du.

Jauregia Esnekiak gasnategi ekologikoak, Anizen, behiak ditu eta bere abeltzaintza-ustiapenera bisita gidatua antolatzen du, haraneko demografia, etnografia eta historiari buruzko informazio interesgarriarekin osatua.

**Leurtzako urtegiek** familientzat leku aproposa dira, naturaz lasai gozatzeko aukera ematen baitute. Udan bainua hartzeko aukera dago, eta urtegiari bira ematen dion ibilbide erraz bat ere bai, adin guztietarako egokia. Gainera, aire zabalean bazkaltzeko **merendero** edo piknik-guneak ditu, mendian egun lasaigarria pasatzeko.

**Baztan Abentura Park** (Beartzun-Elizondo) aukera bikaina da haurrekin bidaiatzen duten familiendako, naturan abentura-kirol anitz eskaintzen baititu, elkarrekin emozioa eta dibertsioa bizitzeko. Horrez gain, **Bertiz Abentura Park** du Narbarten, zuhaitz-ibilbideetan espezializatua, non txikiek zein helduek zuhaitzen arteko zirkuituak segurtasunez eta modu entretenigarrian egin ditzaketen. Parke hauek kirola, aire zabaleko jarduerak eta familia osoarendako esperientzia ahaztezinak uztartzen dituzte.

**Infernuko Errotako** ibilibidea haurrekin gozatzeko aproposa da: itzuli motz eta zelai-zelaia, maldarik gabea, erreka ondotik doana oihan magikoen artean. Kontrabandisten kondaira ugari dituen bide honek familia-ihesaldi zoragarri bihurtzen du.

**Larrungo kremailera-trena**, Sara herrian dagoena, esperientzia paregabea da mendira tren historiko honetan igotzean. Ibilbidean zehar Euskal Kostaldeko eta mendien panoramika ikusgarriak ikusten dira, familia osoarendako plan ezin hobea bihurtuz. Tren honetan bidaiatzea eskualdeko edertasun naturala modu original eta dibertigarrian ezagutzeko modua da.

**Ordoki Zalditegia**, Arizkunen kokatua, Baztan familian ezagutzeko aukera xarmanta da, haurrendako egokitutako zaldi-irteerak eta 7 urtetik goitikoendako hasierako ikastaroak eskaintzen baititu. Ibilbideek basoak, errekatxoak eta herri xarmangarriak zeharkatzeko aukera ematen dute, zaldi gainean ibiltzea gustuko dutenendako esperientzia ahaztezina bihurtuz.

**Bizifly** enpresak Baztanen eta Olaguen eskaintzen dituen paramotor-hegaldiak proposamen zirraragarria dira familiendako, betiere parte-hartzaileek gutxienez 1,30 m-ko altuera badute. Haran atlantikoen gainetik hegan egiteak ikuspegi ikusgarriak eskaintzen ditu, non natura, mendiak eta kostaldeko paisaia batzen diren. Esperientzia segurua eta berezia da gure haranak goialdetik gozatzeko.

**Sunbilla Escape Room** familian egiteko plan bikaina da, betiere helduekin batera joanez gero. Sunbillan kokatzen den Eskape hontan, 50eko hamarkadara eramango zaituztete kontrabandoaren inguruko traman: Guardia Zibilak atxilotu zaituzte eta 75 minutuan ihes egin behar duzue kuarteletik, asmakizunak ebatziz eta elkarlanean arituz; misterioa, dibertsioa eta talde-lana bilatzen dituzten familiendako aproposa.

**Oinaskako ur-jauzia** (Elizondo–Elbete–Elizondo) familian gozatzeko plan bikaina da, naturaz inguratuta eta ingurune ikusgarrian. Ibilbideak malda duten tarteak ditu, hortaz kontuan hartu behar da oso txikiak edo oinez ibiltzera ohituta ez daudenak nekatu egin daitezkeela. Abentura eta paisaia paregabeak uztartzen dituen itzuli interesgarria da.

Baztan-Bidasoa eskualdeko herri guztiek **frontoi publikoak** dituzte, haurrak baloiarekin eta pilotarekin hainbat jolasetan aritzeko.

Horrez gain, herri handienek haur-parkeak dituzte txikienen gozamenerako.

Azkenik, Elizondo, Doneztebe, Sunbilla, Lesaka, Etxalar edo Berako udalerrietan igerileku publikoak daude, batzuk gimnasiodunak eta urte guzian erekiak.