Baztan harana, Nafarroako ipar-ekialdean kokatua dago. Bere 376,81 km2-ekin erkidegoko udalerri zabalena da eta gaurko egunean 8.000 bat lagun bizi dira ibar honetan. Baztan, Pirinio baxuetako haran tipikoa dela erran daiteke: altuera ertaineko mendiak, paisai berde eta hezea, haritzak eta pagoak dira nagusi.
Baztanek 15 herri ditu (Amaiur izan zen sartu zen hondarra, 1969. urtean) 4 kuartel ezberdinetan antolatuak:
- Baztangoiza: Erratzu, Azpilkueta, Arizkun eta Amaiur
- Elizondo: Elizondo, Elbete eta Lekaroz
- Erberea: Irurita, Gartzain, Arraioz eta Oronoz
- Basaburua: Ziga, Aniz, Berroeta eta Almandoz
Laburbilduz, Baztan harana Bortziriak eta Kinto-errealaren artean dagoen zokogunea da. Iparretik hegora, 15 km-ko luzera du, eta bere zabalera km bat eta 3 km tartekoa da (2 luzapen daude; Erratzu / Izpegikoa eta Elizondo / Beartzun / Berdarizekoa).
Baztanek industria guti du eta orain arte errandako guzia kontutan hartuz, ez da harritzekoa nekazal turismoak izan duen goitiera handia. Igoera nabarmen hau azkeneko urteetan izan da batez ere, eta dudarik gabe, diru-sartze handia suposatu du bailararendako.
Baztandarrok gure folklore eta ohiturak gogoz mantendu ditugu mende eta mendeetan zehar, baina bada, dudarik gabe bereziki maite dugun altxor bat: gure euskara edo eskuara, hemen erraten den moduan. Adituek diotenez, euskalki arras aberatsa da, ongi mantendua eta gaurko egunean baztandar gehiengoen ama hizkuntza.
Atentzioa deitzen duen bertze gauza bat Baztango etxe gehienek beren aitzinaldean duten armarria da. Jatorria, 1212. urtean dago, kristauek Nabas de Tolosako gatazka irabazi zutenean. Xakezko taula bat irudikatzen da, erramuko 2 adarrez inguratua.