Legate mendiaren babesean, kasko polit batean aurkitzen da Lekaroz. 5 auzo ditu: Arrazkazan, Oharriz, Aroztegia, Huarte eta Orabidea / Olabidea.
1835. urtean golpe handia jasan zuen Lekarozek. Guda karlistak zirela eta Espoz y Mina jeneralak 30 lekaroztar hil zituen herriko plazan. Ondotik su eman zion herriari, eliza eta 3 etxe bakarrik hondamenditik kanpo gelditu zirelarik.
LEKAROZKO ESKOLA
ekarozko eskola 1888. urtean eraiki zen kaputxino ordenako fraileen eskutik. Eskola honek fama handia lortu zuen estatu mailan eta bertatik familia oneko ikasle aunitz pasatu zen.
Gerra zibilean ordez ospitale lanak burutu behar izan zituen. 1962. urtean sute garrantzitsu bat jasan zuen eta eskola berria eraiki zen zaharraren alboan. Baina urteak pasatuz bezala denboretan ospe handia izandako eskola hau gutxira etorri zen, izan ere gero eta kaputxino gutxiago zegoen irakasteko.
80. hamarkadan Nafar Gobernuak erosi zuen eraikina eta zonaldeko institutu publiko bilakatu zuen.
Arront famatua omen zen Lekarozko eskolako patata tortilla. Sekretua, patata olioan prexitu beharrean zerri gurinean egitean omen zegoen.
